မြန်မာအမျိုးသမီးပွဲစား၏ လိမ်လည်မှုကြောင့် မြန်မာ (၆)ဦး မဲဆောက်လေဆိပ်တွင် ဖမ်းဆီးခံရ

*********************************************
 
ထိုင်းနိုင်ငံ ၊ ဘန်ကောက်မြို့တွင် အလုပ်သွားရောက် လုပ်ကိုင်ရန် မဲဆောက်လေဆိပ်မှ ထွက်ခွာမည့် ရွှေ့ပြောင်းမြန်မာအလုပ်သမား (၆)ဦးမှာ ပွဲစားက စီစဉ်ပေးလိုက်သည့် လေယာဉ်လက်မှတ်အတုကြောင့် ဖမ်းဆီးခံထားရသဖြင့် အလုပ်သမားကူညီရေးအဖွဲ့က ဆောင်ရွက်ပေးနေကြောင်း သိရသည်။

အဆိုပါ မြန်မာနိုင်ငံသား (၆) ဦးအတွက် အလုပ် လုပ်ကိုင်ခွင့်လက်မှတ် ပန်းရောင်ကတ်နှင့် လေယာဉ် လက်မှတ်များကို ပွဲစားဖြစ်သည့် မြန်မာအမျိုးသမီးတစ်ဦးက စီစဉ်ပေးခဲ့ခြင်းဖြစ်ကြောင်း သိရပြီး၊ လေယာဉ်လက်မှတ်မှာ အတုဖြစ်နေသဖြင့် လေဆိပ်တွင် ထိုင်းရဲနှင့် လူဝင်မှုကြီးကြပ်ရေးဌာနမှ ဖမ်းဆီးလိုက်ခြင်းဖြစ်ကြောင်း သိရသည်။

" အလုပ်သမားတွေဟာ ဘာမှနားမလည်ဘဲ ပွဲစားမကောင်းတာကြောင့် ခုတော့ ထောင်ကျမယ့် အခြေအနေနဲ့ ရင်ဆိုင်နေရပြီ။ ဒီနေ့မှာ AAC အဖွဲ့ဟာ မြန်မာပွဲစားမရဲ့ နယ်မြေအထိ ကွင်းဆင်း စစ်ဆေးပြီး အစိုးရ စာရွက်စာတမ်း အတုပြုလုပ်မှု၊ အလုပ်သမားတွေကို ထောင်ကျသည်အထိ လိမ်လည်မှုတို့ အတွက် အမှုဖွင့် ဖမ်းဝရမ်းထုတ်နိုင်အောင် လက်ရှိပြင်ဆင်နေပါတယ်။"ဟု မြန်မာအလုပ်သမားကူညီစောင့်ရှောက်ရေး ကော်မတီအဖွဲ့ဝင်''AAC'' မဟာမိတ်အဖွဲ့ မှ ကိုရဲမင်းက ပြောသည်။

အဆိုပါ မြန်မာအလုပ်သမား(၆)ဦး၏ အမျိုးများက AAC အဖွဲ့ကို အကူအညီတောင်းခံခဲ့သဖြင့် AAC က ဇူလိုင်လ၏ တတိယပတ်က စမွတ်ပါကန်နယ်မြေရဲစခန်းတွင် အဆိုပါ ပွဲစားအမျိုးသမီးအား အမှုဖွင့်ခဲ့သော်လည်း ရဲစခန်းက အမှုဖွင့်ရန် လက်မခံခဲ့ကြောင်း သိရသည်။

''မြန်မာသံရုံးမှာ အလုပ်သမားအဖွဲ့အချို့နဲ့ တွေ့ဆုံစဉ် ဒေါ်အောင်ဆန်းစုကြည်က မှာကြားခဲ့တဲ့ မြန်မာသံရုံး အနေနဲ့ မိမိတို့မြန်မာအလုပ်သမားများ ဥပဒေအရ မှားနေရင်တောင်မှ သံရုံးအနေနဲ့ စောင့်ရှောက် ကာကွယ်ပေးရမယ်လို့ ညွှန်ကြားခဲ့တာကြောင့် ဘန်ကောက်မြန်မာသံရုံး ဝန်ထမ်းတွေ အနေနဲ့ ဒီအမှုမှာ ထိထိရောက်ရောက် ကူညီပေးစေချင်တယ်'' ဟု AAC အဖွဲ့ဒါရိုက်တာ ဦးခိုင်က ပြောသည်။

ဖမ်းဆီးခံရသော မြန်မာအလုပ်သမား(၆)ဦး လွတ်မြောက်ရေးအတွက် AAC အဖွဲ့ မှ ထိုင်းအထူးရဲအဖွဲ့ သို့ ဆက်လက် တင်ပြထားပြီး လိမ်လည်သွားသည့် ပွဲစားအား ဖမ်းဆီးရမိရေးကို ဆက်လက် ဆောင်ရွက်မည် ဖြစ်ကြောင်း သိရသည်။

သတင်း - ကိုဇက်
Tachileik News Agency