ကျောင်းသားသစ်တွေကို ဗိုလ်ကျနှိပ်စက်တဲ့ ထိုင်းတက္ကသိုလ်

ထိုင်းနိုင်ငံ ဘန်ကောက်မြို့က တက္ကသိုလ်တစ်ခု ဖြစ်တဲ့ Ramkhamhaeng တက္ကသိုလ်မှာ စီနီယာ ကျောင်းသားတွေက အသစ်ဝင်လာတဲ့ ကျောင်းသားသစ်တွေကို အနိုင်ကျင့်နှိပ်စက်နေတဲ့ ဓာတ်ပုံတွေ ဟာ ထိုင်းက facebook သုံးစွဲသူတွေကြားမှာ ပျံ့နှံ့နေခဲ့ပါတယ်။ ကျောင်းသားသစ်တွေ အနိုင်ကျင့်ခံနေရတာကို ရိုက်ကူးထားတဲ့ ဓာတ်ပုံပေါင်း ၄၀ ပါဝင်တဲ့ အယ်လ်ဘမ်ကို “Anti-Sotus” လို့ ခေါ်တဲ့ Facebook စာမျက်နှာမှာ စတင်ဖော်ပြခဲ့တာ ဖြစ်ပြီး အဆင့်မြင့်ပညာရေးအဖွဲ့အစည်းတွေမှာ ဗိုလ်ကျစိုးမိုးမှု ပပျောက်ရေး လှုပ်ရှားမှုတစ်ရပ်အနေနဲ့ ဖော်ပြခဲ့တာလို့ သိရပါတယ်။
အဲဒီ Ramkhamhaeng တက္ကသိုလ်ရဲ့ ကျောင်းအုပ် Pathiparn Meepian ကတော့ ဒါဟာ အပျော်သဘောလုပ်ကြတဲ့ အလေ့အကျင့်တစ်ခုသာ ဖြစ်တဲ့အကြောင်း၊ နာကျင်ထိခိုက်တဲ့ပုံ ပေါက်နေကြပေမယ့် အပြင်မှာ တကယ်အဲဒီလောက် မဆိုးရွားကြောင်း ပြောဆိုရင်း စွပ်စွဲချက်တွေကို ငြင်းဆိုခဲ့ပါတယ်။ “ ဒါ အကြမ်းဖက်မှုမှ မဟုတ်တာ။ အဲဒီလို ပြောလို့ ကျွန်တော့်ကို တစ်ကိုယ်ကောင်းဆန်တယ်လို့ ပြောရင်လည်း ပြောပေါ့။ ဒါပေမယ့် ဒီကျောင်းကို လာတဲ့ ကျောင်းသားသစ်တိုင်း ဒီလိုကြုံရမယ်ဆိုတာ သိထားပြီးသားပဲ။ ဒီ သဘောတရားကို နားမလည်ကြတဲ့ အပြင်လူတွေကို ကျွန်တော် ဂရုစိုက်နေမှာ မဟုတ်ဘူး “ လို့ သူက ပြောပါတယ်။

ကျောင်းသားသစ်တွေကို ဝိုင်းပြီး ပညာပြ၊နှိပ်စက်ကြတဲ့ အလေ့အထဟာ ထိုင်းနိုင်ငံက တက္ကသိုလ်တချို့မှာ ရှိနေဆဲ ဖြစ်ပြီးတော့ အဲဒီ အလေ့အထကို ထိုင်းနိုင်ငံနဲ့ အပြည်ပြည်ဆိုင်ရာ မီဒီယာတွေက ဝိုင်းဝန်းကန့်ကွက်နေကြပါတယ်။ ဗိုလ်ကျနှိပ်စက်မှု ၊ လူသားချင်း အရှက်ရအောင် ပြုလုပ်မှုကို ဆန့်ကျင်တဲ့ အဖွဲ့အစည်းတွေလည်း အခုဆိုရင် တစ်စထက် တစ်စ များပြားလာပြီ ဖြစ်ပါတယ်။

Reference - "Asian Correspondence"

စည်သူ (ရိုးရာလေး)