မြန်မာနဲ့ အီတလီဖြစ်ပွားခဲ့တဲ့ ငလျင်နဲ့ပတ်သက်ပြီး ၀မ်းနည်းကြောင်းကုလသမဂ္ဂ လူသားချင်းစာနာထောက်ထားမှုဆိုင်ရာရုံးက ကြေညာ
-----------------------------------------------------------------------------
မြန်မာနိုင်ငံနဲ့ အီတလီမှာ ဖြစ်ပွားခဲ့တဲ့ ငလျင်လှုပ်ခတ်မှုတွေနဲ့ ပတ်သတ်လို့ ကုလသမဂ္ဂ လူသားချင်းစာနာထောက်ထားမှုဆိုင်ရာရုံး (UNOCHA)က ၀မ်းနည်းကြောင်း ကြေညာချက်ထုတ်ပြန်လိုက်ပါတယ်။
ကုလသမဂ္ဂ လူသားချင်းစာနာထောက်ထားမှုဆိုင်ရာရုံး ရဲ့ ဒုတိယအတွင်းရေးမှူးချုပ်၊ အရေးပေါ် ကယ်ဆယ်ရေးဆိုင်ရာ ပူးပေါင်းညှိနှိုင်းရေးမှူး Stephen O’Brien က သြဂုတ်လ ၂၄ ရက်နေ့က ထုတ်ပြန်လိုက်တာပါ။
အဲဒီ ထုတ်ပြန်ချက်ထဲမှာ မြန်မာနဲ့ အီတလီနိုင်ငံတွေမှာ ဖြစ်ပွားခဲ့တဲ့ ငလျင်ဒဏ်အတွင်း ထိခိုက်ပျက်စီးမှု များခဲ့သလို လူတွေရဲ့ အသက် ဆုံးရှုံးခဲ့ရတာတွေအတွက် နှစ်နိုင်ငံအစိုးရနဲ့ ပြည်သူတွေနဲ့ ထပ်တူ ၀မ်းနည်းမိကြောင်း ဖော်ပြထားပါတယ်။
UNOCHA အဖွဲ့အနေနဲ့ တာဝန်ရှိသူတွေနဲ့ ဆက်သွယ်ပြီး နှစ်နိုင်ငံရဲ့ အခြေအနေကို အနီးကပ် ဆက်လက်စောင့်ကြည့်သွားမှာဖြစ်ပါတယ်။ ငလျင်ဒဏ်ကြောင့် ထိခိုက်ခဲ့တဲ့ ပျက်စီးဆုံးရှုံးမှုတွေအတွက် ကုလသမဂ္ဂ နဲ့ မိတ်ဖက်အဖွဲ့အစည်းတွေက ထောက်ပံ့ကူညီပေးဖို့ အသင့်ရှိနေတယ်လို့လည်း အဲဒီ ထုတ်ပြန်ချက်မှာ ဖော်ပြထားပါတယ်။
