အခုတလောမကောင်းဆိုးဝါးတွေကျက်စားတယ်လို့ နာမည်ကြီးနေတဲ့ မန္တလေး ပြင်ဦးလွင်တောင်ဆင်းတောင်တက်လမ်း

မန္တလေးကနေပြင်ဦးလွင်ကို ၄၂မိုင်ကွာဝေးပါတယ်။ဒါပေမယ့်တောင်ဆင်းတောင်တက်လမ်းမို့ ရှိရင်းစွဲထက်ခရီးအကွာအဝေးပိုများတယ်လို့ထင်ရပါတယ်။အခုတလော မန္တလေး- ပြင်ဦးလွင်ကားသမားလောကမှာ သတင်းတစ်ခုခေတ်စားနေပါတယ်။ အဲဒါကတော့ မန္တလေးကတက်လာရင် ၂၁မိုင်ကျော်ပြီး ပြင်စာမရောက်ခင်ကြားမှာ ညဘက်ကားမောင်းလာရင် ကားတွေ ဘရိတ်မမိတော့ပဲ လမ်းဘေးကို ထိုးထိုးဆင်းတာမနည်းတော့ဘူးဆိုတဲ့သတင်းပါ။

ဒါနဲ့ သက်ဆိုင် မသက်ဆိုင်သေချာမသိပေမယ့် အဲဒီနေရာနဲ့ပတ်သက်ပြီး ကျွန်တော်ပြောပြချင်တာတစ်ခုတော့ရှိပါတယ်။

မကြာသေးတဲ့အချိန်က လူတစ်ယောက်က ည ၁၂နာရီခွဲလောက်မှာ မန္တလေးကလေးဆေးရုံမှာသေသွားတဲ့ သူ့ ကလေးလေးရဲ့အလောင်းကိုကားပေါ်တင်ပြီး ညတွင်းချင်းပြင်ဦးလွင်ကိုပြန်တက်လာခဲ့တယ်။ မန္တလေးက သူနဲ့ညီအစ်ကိုလိုနေသူတွေက သူနဲ့အတူ ကားမောင်းဖို့အဖော် ၂ယောက်ထည့်ပေးလိုက်တယ်။သူလည်းသူ့အပူနဲ့သူ ဘာမှလမ်းမှာစကားမပြောပဲလိုက်လာခဲ့တယ်။

ပုသိမ်ကြီးကနေပြင်ဦးလွင်စတက်တဲ့ အချိန်မှာပဲ သူ့နားထဲကို

” ခွင့်မပြုဘူး “ဆိုတဲ့ မိန်းမတစ်ယောက်ရဲ့အသံကိုပီပီသသကြီးကြားလိုက်ရတယ်။မိုးတွေကလည်းသည်းနေ၊ အိပ်ရေးပျက်တာလည်း ၆ရက်လောက်ရှိပြီဆိုတော့ စိတ်ထင်တာနေမှာပါဆိုပြီးကလေးအလောင်းလေးကိုပိုက်ပြီးလာခဲ့ပါတယ်။နောက်မကြာ၊မကြာ မိန်းမတစ်ယောက်ရဲ့ တားမြစ်တဲ့အသံကိုကြားရပါတယ်။ ရှေ့က အဖော်ပါလာတဲ့ ကားမောင်းနေတဲ့သူနဲ့ ဘေးကလူကိုကြည့်တော့ ဘာမှမသိသလိုပါပဲ။ဒါနဲ့ မဖြစ်ချေဘူးဆိုပြီး ကားပေါ်ကတရားခွေတွေဖွင့်တာ တစ်ခွေမှဖွင့်မရပါဘူး။ ဒါနဲ့ ၂၁ မိုင်ရောက်တော့ ကားရပ်ခိုင်းပြီး မိုးသဲသဲထဲကားပေါ်ကပြေးဆင်း ပိတ်နေတဲ့ဆိုင်တစ်ဆိုင်ကိုတံခါးခေါက်ပြီးတရားခွေကိုတောင်းပါတယ်။”သားလေးကိုကားပေါ်မှာဖွင့်ပြချင်လို့ပါ “လို့ပြောတော့ အပူသည်ရုပ်ပေါက်နေတဲ့ သူ့ကိုဆိုင်ရှင်ကသနားပြီး တရားခွေတစ်ခွေပေးလိုက်ပါတယ်။ သူလည်းကျေးဇူးတင်စကားအထပ်ထပ်ပြောပြီး ကားပေါ်ပြန်တက်ပြီး ထွက်လာကြပါတယ်။ မိုးတွေကလည်းပိုသည်းလာပါတယ်။

ဝမ်းသာအားရ ခွေကိုထည့်လိုက်တော့ ပြန်ပြန်ထွက်လာပါတယ်။ ၃ ခါလောက်ထည့်တာမရတော့မှ စဉ်းစားမိပါတယ်။သူ့ကားက VCD ဖွင့်ရဘူး။CD ပဲဖွင့်လို့ရတာကိုလေ။ကားပေါ်ကတရားခွေတွေက အဲဒီညက လုံးဝကိုဖွင့်မရခဲ့ပါဘူး။ သူလည်းငါ့သားလေး တော်တော်လေးကံဆိုးရှာတယ်လို့တွေးနေတုန်း ကားမီးရောင်နဲ့ လမ်းဘေးကိုကြည့်လိုက်တော့ လမ်းလေးက ကားတွေလမ်းဘေးမချော်အောင်တားထားတဲ့ တိုင်တွေထဲက အစွန်ဆုံးတိုင်ကိုမှီပြီး မိန်းမတစ်ယောက်ကျောပေးထိုင်နေတာကိုတွေ့လိုက်ရပါတယ်။ ထမီအဝါကို ရောင်စုံအပွင့်လေးတွေနဲ့ အဆင်ကိုဝတ်ထားတာပါ။အပေါ်ကတော့ မိန်းကလေးတွေဝတ်လေ့ရှိတဲ့ ခပ်ရိုးရိုးပုံပါပဲ။အရောင်ကတော့ အနက်ပါ။

ဒါနဲ့ ညကြီးမင်းကြီး မိုးသည်းသည်းထဲမှာထူးတယ်ဆိုပြီးရှေ့က ကားမောင်းဖို့ခေါ်လာတဲ့ လူနှစ်ယောက်ကိုပြောမလို့လုပ်တုန်း ရှေ့တည့်တည့်ကားမီးရောင်ကနေတဆင့်လမ်းဘေးမှာ စောစောကတွေ့ခဲ့တဲ့ အမျိုးသမီးက သူတို့ကားကို စူးစူးစိုက်စိုက်ကြည့်နေပါတယ်။သူလည်း စိတ်ကိုအတည်ငြိမ်ဆုံးထားလိုက်ပြီး ရှေ့ကလူနှစ်ယောက်ကိုကြည့်တော့ သတိထားမိပုံမရပါဘူး။ ရှေ့ဆက်သွားတဲ့တောက်လျှောက် အဲဒီမိန်းမက ရှေ့ကနေပေါ်လာပြီး ကားကိုမကျေမနပ်နဲ့ စူးစူးစိုက်စိုက်ကြည့်နေပါတယ်။ ကားပေါ်မှာကလေးအလောင်းကလည်းပါလာ၊မိုးကလည်းသည်း၊ ရှေ့ကနှစ်ယောက်လည်းကြောက်မစိုးလို့ ကားကိုဂရုစိုက်မောင်းဖို့ပဲပြောပြီး အဲဒီမိန်းမကြီးလိုက်လာတာကိုမပြောခဲ့ပါဘူး။ဖြစ်ချင်ရာဖြစ်အလောင်းတော့ ရအောင်သယ်ဖို့ဆုံးဖြတ်ပြီးသားပါ။ ကိုယ့်ကလေးအလောင်းသယ်တာ ဘယ်ကောင့်ခွင့်ပြုမိန့်တောင်းရဦးမလဲလို့လည်း လူမိုက်တွေး တွေးမိပါသေးတယ်။

ဘုရားစာတွေရွတ်ပြီးနောက်ကျောမလုံပဲ လိုက်လာတုန်း ပြင်စာကျော်သွားတော့ စောစောကမိန်းမကြီးပါမလာတော့ပါဘူး။ သူလည်း သူ့အပူနဲ့သူ အဲဒီအကြောင်းကိုဆက်မတွေးတော့ပါဘူး။ဒါပေမယ့် သူ့မျက်လုံးထဲမှာတော့ ကားနောက်ကတောက်လျှောက်ပါလာတဲ့ မျက်နှာဖြူဖတ်ဖြူလျော်နဲ့ မိန်းမကြီးမျက်နှာကမကြာခဏပေါ်လာတတ်ပါတယ်။

ဒီမနက်တော့ သူနဲ့ခင်တဲ့ ကားသမားတစ်ယောက်က အခုတလောပြင်ဦးလွင်-မန္တလေးကြားက ပြင်စာနားမှာ မြေကြမ်းတယ်လို့ပြောလာလို့သူလည်း မိုးတစ်ညကသူ့အဖြစ်အပျက်လေးကိုပြန်တွေးမိပါကြောင်း။ ။

Lu Myanmar

Photo Credit: Google